Tallo nga indibidual ti naarestar iti siudad ti Baguio babaen iti bileg ti warrant of arrest manipud iti korte iti nagsisinabali a kaso.
Babaen iti Baguio City Police Station 10, naarestar ti 62-anyos a lalake, maysa a mannalon ken agdama a residente ti Balacbac, Sto.Tomas Proper, Baguio City ken 40-anyos a lalake, maysa a laborer gapu iti panaglabsingda iti Section 68 iti Presidential Decree No. 705 (wenno Revised Forestry Code of the Philippines).
Ti warrant of arrest ket naiyulog manipud iti Regional Trial Court,First Judicial Region, Branch 5, Baguio City.
Nairekomenda met ti P12,000.00 a pyansa kadagiti akusado.
Balligi ti pannakemmeg dagiti dua nga indibidual babaen ti City Intelligence Unit (CIU)-lead unit, Baguio City Police Station 10, Kibungan MPS, City Investigation and Detective Management Unit (CIDMU), Regional Intelligence Division, Police Regional Office Cordillera (RID-PROCAR) ken City Intelligence Team – Baguio, Regional Intelligence Unit 14 (CIT-Baguio RIU 14).
Kabayatanna, balligi ti pannakakemmeg ti lalaki nga agtawen iti 47, residente ti Ferguson Road, Andres Bonifacio, Baguio City, maysa a wanted person babaen metlaeng ti warrant of arrest nga impaulog iti Presiding Judge ti Family Court, First Judicial Region Branch 2, Baguio City.
Naarestar daytoy gapu iti panaglabsingda iti Section 5 (B) iti Republic Act 7610 wenno lascivious conduct ken Republic Act 11313 weno Safe Spaces Act (Gender Based Sexual Harrasment).
Ti nasao a suspek ket nailista kas No. 4 iti Top Most Wanted Persons iti City Level ti Baguio City Police Office iti maikapat a kwarter ti agdama a tawen.
Nairekomenda met ti P120,000 a piyansa iti suspek para iti umuna a kaso na ken P36,000 pay para iti maikadua a kaso.
Nakemmeg ti nasao a suspek babaen iti panangidaulo ti BCPO 7 (lead unit), City Intelligence Unit (CIU), ken City Investigation and Detective Management Unit (CIDMU).
Iti kaudian a report manipud iti pulisya, nagpiyansa ti nasao a suspek iti P60,000 para iti provisional liberty wenno temporaryo a pannakawaya-wayana. //via Bombo Noveh Organo
