Nakemmeg ti maysa a mannalon nga agtawen iti 40 a karaman iti listaan dagiti High Value Individuals (HVI) iti buy-bust operation nga insayangkat iti Philippine National Police Drug Enforcement Group – Special Operations Unit Cordillera Administrative Region (PNP DEG SOU-CAR) idiay Barangay Bulanao, Tabuk City, Kalinga idi Oktubre 22.
Nabigbig ti suspek nga alyas a “Jojo,” nga umili metlaeng iti nasao a lugar.
Nakumpiskar manipod iti suspek ti maysa a rectangular form a nakabalkot iti vacuum-sealed a transparent plastic ken naglaon iti maatap a namaga a bulong iti marijuana nga addaan iti fruiting tops.
Mapatta-patta nga agdagsen iti maysa a kilo ti maatap nga iligal a droga, nga addaan iti mapatta-patta a gatad a P120,000 kas subject of sale wenno banag a mailaklako iti operasion.
Nakumpiskar metlaeng manipod iti suspek ti maysa a pudno a P500 bill a naaramat kas bust money, 14 a bogus a P500 bill a naaramat kas boodle money, maysa a lighter, susi dagiti lugan, walo a ₱100 bill, maysa a cellphone, ken maysa nga eco bag a naglaon metlaeng iti maatap nga iligal a droga.
Ti operasion ket indauloan iti PNP DEG SOU-CAR kas paset iti kampania iti pulisia kontra iti iligal a droga.
Sigun iti report, maitulod ti suspek iti Tabuk City Police Station para iti temporario a pannakaibaludna bayat a maisaysayangkat ti kaskenan a proseso.
Kabayatanna, maisubmitir iti Kalinga Provincial Forensic Unit dagiti nakumpiskar a maatap nga iligal a droga para iti quantitative examination wenno panagsukimat tapno maduktalan ti kinaadu dagitoy.
Adda iti panangaywan met iti PNP DEG SOU-CAR ti dadduma pay a nakumpiskar a kagawaan a saan a droga para iti kaskenan a dokumentasyon ken disposisyon.| via Bombo Vy Organo
