Kinalampag ni Baguio City Mayor Benjamin Magalong ang Ombudsman na simulan na ang pormal na imbestigasyon sa pambansang badyet para sa taong 2024 at 2025.
Ito ay matapos ideklara ng Kataas-taasang Korte na labag sa Saligang Batas ang ilang bahagi ng General Appropriations Act o GAA dahil lumampas ang Kongreso sa kapangyarihan nitong magdagdag ng bilyong-bilyong pondo.
Ayon kay Magalong, kahit nagamit na ang mga nasabing pondo, matutukoy at matutukoy pa rin sa mga dokumento kung mayroong anomalya—basta’t magiging komprehensibo lamang ang pagsasagawa ng imbestigasyon.
Kaugnay nito, iginiit ng alkalde na dapat ding magkaroon ng malalimang pagsusuri o audit ang Komisyon sa Audit o COA. Partikular na ipinapasisilip ni Magalong ang pagtaas ng unprogrammed appropriations sa ilalim ng 2024 at 2025 national budgets, pati na rin ang ilang kwestyonableng probisyon sa kasalukuyang 2026 General Appropriations Act.
Nilinaw naman ng opisyal na hindi ibig sabihing kakasuhan agad ang lahat ng sangkot na indibidwal.
Ang layunin aniya ay tukuyin kung aling mga nailabas at nagamit nang pondo ang may malinaw na intensyon o layunin para sa graft and corruption.
Ibinahagi pa ni Magalong ang kanyang karanasan bilang dating pinunong tagapagsiyasat sa National Irrigation Administration o NIA kung saan humawak siya ng mga anomalya sa mga pambansang proyekto.
Binigyang-diin niya na sa pamamagitan lamang ng pagsusuri sa mga pormas at dokumento, kitang-kita kung ang isang proyekto ay overpriced o kaya naman ay hindi pumasa sa itinakdang mga pamantayan.
Samantala, inanunsyo naman ng Office of the Ombudsman ang pagbuo ng isang special group na tututok sa naging desisyon ng Korte Suprema kaugnay ng 2024 at 2025 General Appropriations Act (GAA).
Aniya, susuriin ng nasabing grupo ang mga kuwestiyonableng budget allocation upang matukoy ang posibleng pananagutan ng mga opisyal na sangkot sa mga ito, alinsunod sa umiiral na batas.
