Impanamnama ti Bureau of Jail Management and Penology – Cordillera Administrative Region nga agtultuloy ti panangipatungpal daytoy kadagiti programa tapno matulongan dagiti Persons Deprived of Liberty (PDLs) nga agbalin a nasayaat ken produktibo a miembro ti komunidad kalpasan ti pannakawayawaya dagitoy.
Sigun kenni Jail Chief Superintendent Delvic L. Oreiro, Regional Director ti BJMP-CAR, ipapaay ti ahensia ti nagduduma a programa ken aktibidad kadagiti persons deprived of liberty (PDLs) bayat ti pannakaaywan kadakuada ti City, District ken Municipal jails.
Kalpasan ti pannakawayawayada, namnamaen ti BJMP-CAR a mausar dagiti nasursuro ken kabaelanda tapno agbalinda a produktibo, nangruna kas miembro ti pamilia ken paset ti komunidad.
Sigun kenni Oreiro, paset ti responsibilidad ti ahensia ti panangpabileg kadagiti PDLs babaen iti rehabilitasyon tapno maliklikan ti panagaramidda manen kadagiti krimen.
Iti sabali a bangir, itultuloy met ti BJMP-CAR ti panangipatungpal kadagiti lokal nga ordinansa a manglaban iti diskriminasyon kadagiti sigud a PDLs.
Sigun kenkuana, pasayaatenda ti panagaramat kadagiti data ken statistics tapno maipakaammo kadagiti lokal a gobierno ti kasasaad dagiti PDLs ken dagiti masapul a suporta para iti nasayaat a panagsublida iti komunidad.
Inlawlawagna a pasayaaten ti BJMP-CAR ti statistical dashboard a mangipakita kadagiti datos maipapan kadagiti PDLs tapno maaramat dagitoy a pagbasaran iti panagaramid dagiti lokal a gobierno kadagiti polisiya ken ordinansa a mangipaay iti maikadua a gundaway kadagiti sigud a PDLs.
Sigun kenkuana, addaan iti kapabuklan nga 884 a PDLs dagiti pasilidad ti BJMP iti regional facilities.
Inlawlawag ni Oreiro a nagbaliw met ti panangimanehar iti correctional facilities manipud iti panangsalimetmet laeng kadagiti PDLs agingga iti panangipangpangruna iti holistic rehabilitation tapno maisagana manen dagitoy iti panagbiag iti ruar ti pagbaludan.
Innayunna a napateg ti panangawat ti komunidad, suporta iti mental health, ken pannakitinnulong dagiti nagduduma a sektor tapno mapasayaat ti panagsubli dagiti sigud a PDLs iti komunidad.
Kabayatanna, namnamaen ti BJMP-CAR a babaen kadagitoy a programa ken panangaramid kadagiti lokal a polisiya ket maikkat ti stigma ken diskriminasyon kadagiti sigud a PDLs, ken matulongan dagitoy a mangrugi manen iti nasayaat ken produktibo a panagbiag.// Bombo Khey Reparip
