Sinita ken pinalagipan ni Senator-Judge Erwin Tulfo ni Davao City Assessor Engr. Jaime Adalin nga under oath daytoy gapu iti saan a nalawag a sungbatna seknan iti panagbiyahena sadiay China idi Nobiembre 2025.
Daytoy ket kalpasan a sinaludsud ni private prosecutor Atty. Benjamin Tolosa Jr. no karaman daytoy kadagiti opisial ti Davao City a nagturong sadiay China.
Sigun kenni Adalin, saanna a malagip no karaman daytoy kadagiti opisial ti Davao City a nagturong iti nasao a pagilian para iti all-expenses-paid trip a maatap nga inisponsoran ti Chinese Consulate.
Innayon pay ni Adalin nga awan ti pakainaigan ti saludsod iti nasao a hearing.
Iti baet dayta, impaganetget ni Tolosa a paset ti karbenganna nga agdamag tapno masukimat ti kredibilidad ti testigo .
Gapu iti daytoy, pinalagipan ni Tulfo ni Adalin a seryoswenna ti testimonya daytoy agsipudta nagsapata kas testigo ken mabalin nga agsungbat no maduklan nga agul-ulbod.
