LA TRINIDAD, BENGUET – Inwaragawag ni Mayor Roderick Awingan a panggep ti munisipyo ti La Trinidad, Benguet nga irevisit ti ordinansa iti munispyo seknan iti health hazard.
Daytoy ti kinuna ti nasao a Mayor kalpasan ti pannangiyebkas ti maysa a government employee iti pakaseknanna panggep iti hazard pay nangruna kadagiti saan a nangato ti positionna kas empleyado bayat ti programa a “Honoring Service Awardees and outstanding public servants.”
Sigun kenni Felimon Caya-os, administrative aide IV driver II ken maysa kadagiti awardees iti 35 years in government service, ay-ayatenna ti trabaho daytoy iti baet nga adda dagiti isyu a sangsangwenna kas iti hazard pay.
Sigun met kenni Mayor Awingan, agkiddaw dagitoy iti reconsideration iti Sangguniang Panlalawigan tapnu maireconsiderate ti ordinansa nga impasa dagitoy para kadagiti sumagmamano nga empleyado.
Maipalagip nga iti munisipyo ti La Trinidad, addaan dagitoy iti Municipal Ordinace # 31-2026 no sadinno makaawat dagiti qualified solid waste management personnel iti sag- P2,500.00 a monthly health hazard.
Naaprubaran daytoy idi August 25, 2026 ngem saan pay a naimplementar gaputa kasapulan a repasuen ti Sangguniang Panlalawigan (SP).
Dagiti qualified solid waste management personnel ket pakairaman dagiti garbage collectors ,truck drivers, garbage sorters, heavy equipment operator, street and park sweepers, office utility workers ken dagduma pay nga adda iti sanitation ken maintenance duties.
Iti sabali a bangir, kas paset ti Civil Service Month, pinadayawan ti lokal a gobierno ti La Trinidad dagiti sumagmamano nga empleyado a nagserbi iti agarup 10 agingga 35 a tawen kas panangapresiya iti serbisyo nga impaayda iti gobierno .
Malaksid iti dayta, adda metlaeng ti naipaay a pammadayaw kadagiti sumagmamano nga empleyado nga awan ti absent ken nasapa a sumsumrek iti trabaho no sadinno kadawyan kadagitoy ket dagiti garbage collectors.//Bombo Noveh Organo
