Impresenta ti kampo ni Vice President Sara Duterte iti impeachment trial idi Huebes ti Statements of Assets, Liabilities and Net Worth (SALN) ni President Ferdinand “Bongbong” Marcos Jr. ken sigud a Vice President ken agdama a Naga City Mayor Leni Robredo.
Kagiddan iti daytoy, kinuwestionaran ni defense counsel Mark Vinluan ti financial investigator a ni Rainer Dela Fuente seknan iti negosyo ken sanikua a nakalanad iti SALN ni President Marcos Jr.
Sigun kenni Dela Fuente, awan ti mapagduaduaan iti deklarasion ken maibilbilang laeng daytoy a kadawyan nga impormasion.
Naipresenta metlaeng ti 2022 SALN ni Marcos nga addaan iti P960.7 million,bayat a dimmanon iti P1.1 Billion ti indeklara daytoy a net worth idi 2023.
Kabayatanna, naiparang metlaeng ti SALN ni sigud a Vice President Robrido a nagalaon iti shares of stocks iti Meralco.
Sigun iti financial investigator, awan ti makita a pagduaduaan iti nasao a deklarasion.
Immuna a kinontra ti prosekusion ti diskusion seknan iti SALN da Marcos ken Robredo, agsipudta sigun kadakuada, awan ti pakainaiganna kadagiti isyu a sangsanguen ni Duterte iti impeachment trial.











