Inwaragawag ti prosecution panel a napaay ti kampo ni Vice President Sara Duterte nga agbaken dagiti ebidensiya kontra kenkuana.
Sigun kenni House prosecution adviser Ace Barbers, saan a kualipikado nga agsungbat kadagiti damag ti naudi a testigo a ni Rainer Dela Fuente, founder ti AML Consulting PH gapu iti kinakurang daytoy iti kapadasan.
Pinagduduaan metlaeng dagiti sumagmamano a senador ti kabaelan ni Dela Fuente a mangilawlawag iti immun-una a report a mangibagbaga nga addaan ni Duterte iti P817 milion nga unexplained wealth.
Kabayatanna, kinuna ni House Prosecutor Chel Diokno a nasdaaw agsipudta saan a binasa ni Dela Fuente dagiti pinansial a rekord a nakaibatayan ti opinion daytoy.
Impaganetget ni Diokno a masapul nga umuna a pamiliar ken nabasa ti maysa nga eksperto dagiti mainaig a dokumento sakbay a mangipaay iti komento seknan iti panagsukimat daytoy.











