--Ads--

Mabalin a makagun-od iti libre a PhilHealth coverage dagiti rehistrado a solo parent ken dagiti kualipikado a dependentda, uray dagiti addaan iti trabaho iti pribado wenno gobierno, babaen iti napabaro a pagannurutan ti Philippine Health Insurance Corporation (PhilHealth).

Daytoy ket maipatungpal babaen iti PhilHealth Circular No. 2026-0015 a mangipatungpal kadagiti probisyon ti Republic Act No. 11861 wenno ti Expanded Solo Parents Welfare Act, a mangipapaay iti automatic coverage kadagiti kualipikado a solo parent iti National Health Insurance Program (NHIP).

Sigun iti baro a pagannurutan, ti National Government ti mangsabsidya iti premium contribution dagiti solo parent. Para kadagiti empleadoda iti formal sector, ti gobyerno ti agbayad iti personal share da, bayat a masapul latta nga ituloy ti employer ti panagbayad iti bukodna a share.

Nupay kasta, saan a dagus a maikkat ti kaltas iti sweldo dagiti empleado a solo parent, ta masapul pay a ma-update ken ma-validate ti membership recordda iti PhilHealth babaen iti panangisumite kadagiti kasapulan a dokumento.

Tapno makaala iti benepisio, masapul a rehistrado dagiti solo parent iti Solo Parents Office wenno Solo Parents Division ti lokal a gobierno ken addaan iti balido a Solo Parent Identification Card (SPIC).

Mabalin nga isumitirda ti PhilHealth Member Registration Form (PMRF) ken kopia ti sango ken likudan ti SPIC iti Human Resources Department ti pagtrabahuanda wenno direkta iti kaasidegan a PhilHealth Local Health Insurance Office (LHIO). Mabalin met nga ipatulod dagiti dokumento babaen iti PhilHealth Member Portal, segun kadagiti maipakat a pagannurutan.

Para kadagiti awanan trabaho wenno self-employed a solo parent, mabalin a direkta nga isumitir dagiti dokumento iti kaasidegan nga LHIO.

Maibilang met a kualipikado a dependent dagiti annak a makipagnaed ken agdepende iti solo parent para iti suporta, saan pay a naasawaan, awan trabaho ken agtawen iti 22 wenno nababbaba. Saklawen met dagiti nataengan ngem saan a kabaelan nga asikasuen dagiti bagbagida gapu iti physical wenno mental disability.

Malaksid iti premium subsidy, maikari met dagiti solo parent ken dagiti kualipikado a dependentda kadagiti amin a benepisio ti NHIP, pakairamanan ti Yaman ng Kalusugan (YAKAP) ken Guaranteed and Accessible Medications for Outpatient Treatment (GAMOT).

Maipatungpal met kadakuada ti No Co-Payment ken No Balance Billing policy, segun kadagiti agdama a pagannurutan ti PhilHealth.

Impaganetget met ti PhilHealth a masapul a mangipakaammo dagiti benepisiario iti panagpabaro wenno panag-renew ti SPICda kada tawen sakbay a maibus ti pannakabalinna tapno saan a maputol wenno maibabain ti klasipikasionda iti sistema ti ahensia.

Babaen iti daytoy a pagannurutan, pabilgen ti gobierno ti pannakaakses dagiti solo parent ken dagiti annakda iti serbisio pangsalun-at, bayat a mangpabassit iti pinansial a dadagsen a masabatda iti panangaywan ken panangtaripato kadagiti pamilia.//Bombo Khey Reparip