BAGUIO CITY – Naipasidongen iti Enhanced Community Quarantine (ECQ) ti entero a probinsia ti Abra, nangrugi ita nga aldaw, September 1 agingga inton September 7, 2021 kas nailanad iti pammilin nga impaulog ni Governor Joy Bernos.
Gapu iti daytoy, maysa laeng a miyembro ti pamilya ti mapalubosan a rumwar iti pagtaenganda para kadagiti kangrunaan a pagkasapulan babaen ti panagaramatda ti White Pass bayat a kasapulan met ti Company ID no agturong kadagiti pagtrabahoan.
Maiparit met ti panagruwar dagiti 18-anyos nga agpababa ken dagiti 65-anyos nga agpangato malaksid no adda ti napateg a gagara dagitoy.
Maiyemplementar ti curfew nga 8:00PM agingga 4:00AM ken ti panakaipatungpal ti liquor ban, No Face Mask No Face Shield, No Ride Policy ken 50% seating capacity kadagiti pribado a lugan.
Suspendido ti operasyon dagiti establishimento ken negosyo kas iti dine-in services, accommodation ken hotels, tourism activities, face-to-face classes, social gathering ken non-essential work gatherings.
Kabayatanna, mapalubosan laeng ti panagserrek ken panagruwar dagiti APORs nga addaan ti official business bayat a maipasidong iti quarantine dagiti sumrek sadiay Abra nga addaan ti sintomas nga uray addaanda ti negatibo a resulta ti RT-PCR test ken maiparit ti panag-home quarantine dagiti nagawid nga OFWs.
