Impaganet ni House prosecutor ken Bicol Saro Party-list Rep. Terry Ridon a napigsa paylaeng ti suporta para iti pannakaikkat ni Vice President Sara Duterte, uray kadagiti mammanday-linteg manipud Visayas ken Mindanao a pagaammo a balwarte ti pamilia Duterte.
Sigun kenni Ridon, pinaneknekan ti botos ti Kamara a ti suporta iti impeachment ket nagtaud iti nagduduma a partido politika, rehion ken alyansa.
Maipalagip a dumanon iti 257 a mammanday linteg ti pimmabor iti articles of impeachment kontra kenni VP Duterte.
Maibasar iti opisial a datos ti Kamara, dumanon iti 43 kadagiti 50 a mammanday linteg ti pabor sadiay Visayas; 41 iti 61 a kongresista ti pabor sadiay Mindanao bayat a 125 iti 142 a kongresista iti Luzon ti pabor iti impeachment kontra iti bise presidente.
Sigun kenni Ridon, mammaneknek daytoy a saan nga agpayso ti alegasyon a ti impeachment ket para laeng iti bukod nga interest ti Luzon wenno ti maibagbaga nga “Imperial Manila.”
Sumangsango ti bise presidente iti impeachment case gapu iti maatap a saan nga umno a pannkaaramat ti P612.5 million a confidential funds, limed a kinabaknang, panangpangta iti biag ni President Ferdinand R. Marcos Jr., First Lady Liza Araneta-Marcos, sigud nga Speaker Ferdinand Martin G. Romualdez ken dadduma pay.
Kabayatanna, agserbi kas impeachment court ti Senado intun Lunes, Mayo 18, 2026.
