Kidkiddawen ti Catholic group Couples for Christ (CFC) iti gobierno ti Pilipinas a rumbeng a saan a maipasa ti absolute divorce bill gaputa situtulokda a mangirugi iti people’s initiative a mangwaswas iti addang apaman a maipaulog daytoy kas linteg.
Sigun iti maysa nga spiritual adviser, palubusan ti Iglesia Katolika ti legal a panagsina ngem saanda nga ipalubos a makiasawa manen iti maysa nga indibidual.
Inlawlawagna a mabalin a saan nga agtalinaed ti babai iti maysa a balay nangruna nu madangdangran daytoy.
Mabalin nga agbiagda nga agsina ngem agtalinaed ti singgalut ti panagasawa dagitoy.
Para met iti Catholic Bishops Conference of the Philippines (CBCP), mabalin nga ipaay ti gobierno ti tulong kadagiti babbai a biktima iti panangabuso ken kinaranggas.
Kiddawda pay iti gobierno a maamyendaran kuma ti Family Code of the Philippines tapno ad-adda a natibker ti pannakaipatungpal daytoy.
Iti sidong gamin ti agdama a Family Code, ti violence against women and children (VAWC) ket pangibayan laeng iti legal a panagsina, nu sadinno, saan a maipalubos ti legal a panagsina kadagiti nagsina nga agassawa a makiasawa manen.
