Nakaburol na ang bangkay ng isang 25-anyos na security guard sa Benguet Memorial Services.
Iniulat na nawawala ang lalaki ng kanyang kapatid noong Marso 19, at kalaunan ay natagpuan ang kanyang bangkay kinahapunan ng sumunod na araw.
Ayon sa pulisya, mula gabi ng Marso 18 hanggang madaling araw ng Marso 19 ay nakikipag-inuman ang biktima sa tatlo pang kapwa niya security guard sa T. Alonzo Street, Baguio City. Matapos nito, nagtungo sila sa Magsaysay Avenue kung saan ipinagpatuloy ang kanilang pag-inom.
Sa kalaunan, labis na nalasing ang biktima. Sinamahan siya ng isa sa kanyang mga kasama pauwi. Habang nasa daan, bigla umanong tumakbo ang biktima patungo sa slaughter area at nagtangkang tumalon mula sa mataas na lugar, ngunit napigilan siya ng kanyang kasama.
Dahil sa insidente, nagpasya ang kasama na ihatid na lamang siya. Gayunpaman, habang sila ay nasa kalsada, muli na namang nagtangkang tumalon ang biktima ngunit muli itong napigilan.
Pagdating sa munisipyo ng La Trinidad, hindi matukoy ng kasama ang tirahan ng biktima dahil hindi ito makapagbigay ng malinaw na impormasyon. Dahil dito, bumalik sila sa bangkong pinagtatrabahuhan ng biktima sa KM 4 upang maghanap ng pansamantalang titirhan ng lalaki.
Sinubukan ding tawagan ng kasama ang pamilya ng biktima, ngunit hindi sumasagot ang kanyang live-in partner.
Habang nagpapahinga at hinihintay na kumalma ang biktima, may dumaan na pulis. Nais sanang humingi ng tulong ng kanyang kasama, ngunit bigla na lamang tumakbo ang biktima sa harap ng Tiongsan at nagtungo sa direksyon ng Pines Park. Nasaksihan din ito ng naka-duty na guwardiya sa bangko.
Sinubukan siyang habulin ng kanyang kasama, ngunit tuluyan na siyang nawala sa paningin.
Batay sa kuha ng CCTV, tuloy-tuloy ang pagtakbo ng biktima. Sa isang bahagi, pansamantala siyang huminto at umiwas sa kasalubong na sasakyan bago muling nagpatuloy hanggang sa marating ang pinangyarihan ng insidente.
Sa huling kuha ng CCTV, makikitang tumalon ang biktima—ito na ang huling pagkakataong nakita siyang buhay.
Ayon naman kay PLtCol. Zacharias Caloy Dausen,Chief of Police ti La Trinidad Municipal Police Station, isa lamang teorya na maaaring nadulas o nahulog ang biktima. Aniya, may tarangkahan sa lugar na pinangyarihan ng insidente na sinira umano ng biktima bago ito nagpatuloy sa paglalakad o pagtakbo. Posible rin umanong hindi nito namalayan na papunta na siya sa Balili River.
Dagdag pa ng opisyal, kung intensyon umanong magpakamatay ang biktima, mas malamang na tumalon ito sa bahagi ng Pines Park.
Batay sa opisyal na resulta ng autopsy, nalunod ang biktima. Posible umanong siya ay lasing, nawalan ng malay, o natumba bago tuluyang malunod.
Ayon pa kay Dausen, walang nakitang palatandaan ng foul play dahil walang bali o anumang sugat na natukoy sa katawan ng biktima.
Napag-alaman din na nahulog ang biktima mula sa taas na tinatayang 5 hanggang 6 na metro, at natagpuan ang kanyang katawan mga 20 hanggang 30 metro mula sa pinangyarihan ng pagkahulog.
Samantala, ayon sa may-ari ng gate, napansin umano nito ang isang pares ng pantalon sa Balili River bandang alas-9 ng umaga, ngunit hindi niya ito pinansin dahil inakala niyang basura lamang ito.
Pagsapit ng alas-2 ng hapon, may mga batang nakakita ng isang lumulutang na katawan sa nasabing lugar.
Agad na nakilala ang biktima sa pamamagitan ng kanyang tattoo, na kalaunan ay kinumpirma ng kanyang kaanak.
Dagdag pa ni Dausen, malaking tulong ang mga nakuhang CCTV footage sa paglilinaw ng pangyayari.
Sa kabilang banda, hinihikayat ang publiko na agad iulat sa mga awtoridad ang anumang kahina-hinalang aktibidad.
Samantala, inaasahang makikipag-ugnayan ang LTMPS sa munisipyo o sa kinauukulang tanggapan upang magsagawa ng debriefing para sa mga batang nakakita sa bangkay ng biktima.
