BAGUIO CITY – Im-imbestigaranen ti lokal a gobyerno ti Baguio ti panaglabsing ti grupo dagiti aktor a mangisaysayangkat ti shooting ti maysa a pelikula ditoy siudad kalpasan a nagpositibo iti COVID-19 ti 10 kadagitoy.
Sigun kenni Mayor Benjamin Magalong, ti grupo ket bukbuklen ti 100 nga indibidual nga idadauluan ti aktor a ni Arjo Atayde, no sadino, nagpositibo iti COVID-19 ti aktor ken siyam a kakadwa daytoy kas maibasar iti resulta ti RT-PCR dagitoy a naisayangkat idi Dominggo, August 15.
Inlawlawagna a naipaayan ti grupo ni Atayde iti pammalubos nga agtalinaed ditoy siudad ken mangisayangkat ti film shooting idi pay napalabas a bulan gaputa adda ti kari dagitoy nga agtalinaedda iti bubble a kaipapananna ket saanda a mabalin a rumwar ken sumrek iti siudad bayat ti shooting.
Kinunana nga addadan ditoy siudad idi napalabas a bulan sakbay pay ti implementasyon ti ECQ iti National Capital Region.
Nupay kasta, imbutaktak ni Mayor Magalong a naduktalanda nga adda dagiti gundaway nga agaw-awid dagiti crew members ken agsubsublida ditoy siudad a saanda a dumaldalan iti triage isut gapuna a saanda a maipasidong iti test.
Innayonna a napaay pay ti grupo ni Atayde a mangtungpal iti commitment dagitoy a binulan a panakaipasidongda iti COVID testing.
Dinakamatna pay nga idi Lunes ket killaat a pimmanaw iti siudad ni Atayde ken ti assistant daytoy a saan a naipaka-ammo iti lokal a gobyerno.
Nupay kasta, nagpatulod ti mayor iti text message kenni Atayde a mangibilbilin iti maaramid iti grupo daytoy a nabati ditoy siudad.
Iti met interview ti Bombo Radyo Baguio kenni City Administrator Engr. Bonifacio Dela Peña, kinunana a makikokoordinardan iti Film Development Council of the Philippines (FDCP) para iti panangipatulod dagitoy ti ambulansia a mangsukon kadagiti walo a kakadwa ni Atayde a nagpositibo iti COVID-19 nga adda ita iti maysa nga isolation facility ti siudad.
Kitkitaenda met no kasano a masukon dagiti maseknan nga LGUs dagiti nabatbati a crew ti aktor.
Iti agdama, nainget met a mabambantayan dagiti 90 a kameng ti crew nga adda ita iti maysa a hotel ken maipasidong dagitoy iti swab testing kalpasan ti lima nga aldaw.
Gapu iti insidente, kinuna ni Mayor Magalong nga irtengan pay ti siudad ti panagmonitor kadagiti protocols para kadagiti sumarsaruno a grupo a mangisayangkat ti film shooting ditoy Baguio tapnu maipasigurado ti panakatungpal dagiti health measures ken community quarantine guidelines.
