BAGUIO CITY – Posible nga ad-adda pay a bumaba ti temperatura iti lokalidad agingga iti bulan ti Pebrero.
Iti interview ti Bombo Radyo Baguio, inlawlawag ni senior weather specialist Ceferino Hulipas ti PAGASA-Baguio a gapu daytoy iti mapaspasaran ita a northeast monsoon wenno amian iti Luzon.
Kinunana nga iti bulan ti disyembre agingga pebrero a marikna ti kapigsaan nga epekto ti amian.
Gapu iti daytoy, imbalakadna ti panagsuot dagiti umili iti napupuskol a badbado tapnu makaliklikda iti saan a napintas nga epekto ti nalammiis a panawen.
Maibasar iti rekord ti PAGASA-Baguio, 10.4 degrees Celcius ti kababaan paylaeng a temperatura iti Baguio City para ita a tawen 2021 nupay nababbaba ti temperatura kadagiti nangangato a munisipyo iti Benguet, Mountain Province ken Ifugao.
