BAGUIO CITY – Agtaltalinaed a parikot ditoy syudad iti adu a bilang dagiti makapkaptan iti sakit nga HIV aids iti baet ti agtultuloy nga information drive ken campaign dagiti maseknan nga ahensiya ken opisina iti gobierno.
Sigun ken Michelle Dominique Garcia, Med/Tech ken HIV coordinator manipod Baguio City Health Services Office, manipod 1984 agingga February 2022, nakailista ti Baguio City iti 494 a kaso ti HIV Aids.
Kinunana a ti nadakamat a datos ket bilang laeng dagiti residente ti siudad a naipasidong iti HIV Aids test kadagiti ospital, healt facilities ken daduma pay a venue nga pangisaysayangkatanda iti testing.
Innayonna a posible nga adu kadagiti positibo iti HIV Aids ti saanda paylaeng a naduktalan gaputa mabutengda ken agkedkedda nga agpa-test.
Gapu iti dayta, kiniddawna kadagiti maseknan nga agpa-test dagitoy bayat a nasapa pay tapnu maipaayanda iti kaskenan a tulong medikal.
Mainaig iti daytoy a damag, nangisayangkat ti CHSO, DOH ken HIV Advocates iti International candle lights memorial idi kalman, May 23, 2022.sadiay Baguio City Hall ground kas pananglagipda kadagiti pimmusay gapu iti HIV Aids.
Malaksid iti dayta, adda ti naisayangkat a libre nga HIV Aids test iti publiko iti lobby ti city hall.
