BAGUIO CITY–Rumrumwar iti kaudian a survey nga insayangkat iti Baguio City Health Services Office nga adu kadagiti senior citizens wenno natataengan ditoy siudad ti saan nga umanamong nga agbapakuna iti covid-19 vaccine.
Sigun kenni Dr. Dandeo Halog, medical officer ti nasao nga opisina, adu paylaeng a senior citizens ditoy siyudad ti agkedked nga agpalista iti master listing para iti COVID-19 Vaccination.
Innaklonna nga iti baet ti panangisayangkatda iti nagduduma a kampanyas kas iti information dissimination iti kinapateg ti panagpabakuna iti covid-19 ket saan latta a mapunas ti amak dagiti senior citizens iti umadanin nga covid-19 vaccination roll out iti siyudad.
Kinunana a malidayanda no saan a maguyugoy dagiti amin a senior citizens iti siudad nga agpabakuna ngem inyunay-unayna met a saan a nasken a mapilit dagitoy gaputa karbenganda nga agkedked.
Gapu iti daytoy, dinakamat ni Dr. Halog a posible a kasapulan pay ti naunday a panawen wennu mabayagan dagitoy a mangallukoy kadagitoy senior citizens isut gapuna nga ituloyda lkatta ti panangkumbinsir ken panangimpormar kadagitoy.
Immuna metten a naiwaragawag nga maysa dagiti nakukurapay a senior citizens a maipangruna a mabakunaan iti covid-19 vaccines malaksid laeng kadagiti frontliners.
