Nakaibayog ita iti red alert status ti Armed Forces of the Philippines (AFP) kagiddan ti agtultuloy a panakaipatungpal dagiti tignay-protesta iti nagduduma a lugar iti Metro Manila mainaig kadagiti naanomalyaan a flood control projects.
Sigun kenni AFP Spokesperson Colonel Francel Margareth Padilla, amin a yunit iti nasao a military force ket naipasidong iti nasao nga status sipud pay idi Biernes, September 12.
Daytoy ket kas panagsaganada iti panangsuporta iti Philippine National Police (PNP) tapno maipanamnama ti kinatalged ken seguridad kadagiti aktibidad nga ipatpatungpal dagiti progresibo a grupo.
Kagiddan dayta, inlawlawag ti opisyal a ti nasao a tignay ket paset ti standard security measures dagitoy ngem kinunana nga awan iti rumbeng a pagdanagan ti publiko iti agdama sitawasyon dagiti maisaysayangkat tignay-protesta.
Maipalagip nga idi laeng napan a lawas ket nagduduma a grupo ti nangisayangkat kadagiti rally ken manamnama pay a mangipatungpal dagiti daduma kadagiti umay nga al-aldaw.
