BAGUIO CITY – Agarup itan iti dua ribo a karaman iti A4 category a buklen dagiti vendors ken porters ti Baguio City Public Market ti nabakunaan kontra iti COVID-19.
Iti interview ti Bombo Raydo Baguio kenni City Market Superintendent Marieta Alvarez, kinunana a mapatta-patta 50% itan iti populasyon ti vendors ken stall owners iti merkado publiko ti nabakunaan.
Sigun kenkuana, buklen dagiti nabakunaan nga indibidual kagudwa a bilang ti agarup 4,000 a populasyon dagiti vendors ken stall owners iti merkado publiko.
Dinakamatna nga umad-ado pay kadagitoy ti interesado nga agpabakuna gaputa add dagiti sumagmamano a nagpabakuna kadagiti dadduma a vaccination sites malaksid iti naisayangkat nga uppat a vaccination activities iti public market.
Innyaona a naobserbaranda pay nga ado kadagitoy ti makaammo itan iti kinapateg ti panagpabakuna kas proteksion iti pangta ti COVID-19 ken dadduma pay nga sakit.
Kabayatanna, inlawlawagna a saan a mandatory ti panagpabakuna ken awan ti polisiya iti public market a malapdan ti panangilako dagiti vendors wenno stall owners no saan dagitoy a nagpabakuna.
Nupay kasta, guyguyuguyenna latta dagiti saan pay a nabakunaan tapnu gundawayanda nga agpabakuna tapnu masalwadan dagitoy iti delta variant ti COVID-19.
Inyunay-unayna met ti scheduling wenno pannakaituding ti panagbakuna iti merkado publiko gaputta agdepdependar daytoy iti pakdaar ti City Health Services Office no addan ti umdas nga supply ti bakuna wenno personnel dagitoy a mangipatungpal iti vaccination.
Impalagipna pay a dagiti laeng vendors ken stall owners ti maakomodar kadagiti vaccination activities iti public market nu sadinno nasken nga iparangda ti registration iti bakuna, valid id ken business permit dagitoy.
