BAGUIO CITY – Dagus a naikali ti agarup 200 a kilo ti frozen meat products ken karne ti baboy kalpasan a nakumpiskar dagitoy iti main checkpoint sadiay Tangadan, San Quintin, Abra a pastrek iti probinsia.
Maibasar iti report ti Office of the Provincial Veterinarian ti Abra, paset daytoy ti quarantine control protocol ken food safety measures ti provincial government tapnu maliklikan ti panakaiserrek ti African Swine Fever (ASF) iti masakupan ti probinsia.
Impetteng ti opisina a maipawil ti panakaiserrek sadiay ti aniaman a klase ti meat products a nagtaud iti ruar ti Abra.
Gapu iti daytoy, ad-adda a nairtengan ti panakabantay dagiti border checkpoints ti Abra tapnu awan dagiti iligal a maiserrek sadiay a produkto a mangitunda iti panagsakit ken panakatay dagiti taraken a baboy.
Umap-apela pay ti opisina kadagiti residente sadiay Abra iti dagusda a panangireport kadagiti otoridad no adda ti ammoda a mangilaklako kadagiti produkto a karne a nagtaud iti ruar ti probinsia.
