Imbutaktak ni House impeachment prosecutor ken Bicol Saro Party-list Rep. Terry Ridon a posible a saan a bumababa iti 50 a paltog ti maatap a nakarehistro iti nagan ni Vice President Sara Duterte ken ti asawana a ni Manases “Mans” Carpio.
Sigun kenni Ridon, posible a daytoy ti nangipangato iti aktual a net worth dagiti agassawa no idilig iti nakalanad iti Statement of Assets, Liabilities and Net Worth (SALN) ti Bise Presidente.
Kabayatanna, kiddawen ti prosecution panel iti Philippine National Police (PNP) dagiti rekord ti paltog a kukua dagiti agassawa.
Posible metlaeng a mapaayaban dagitoy ti firearms dealer ken valuation experts iti impeachment trial tapno mabigbig ti gatad dagiti paltog.
Inyunay-unay ni Ridon a rumbeng a karaman dagiti paltog iti SALN gaputa karaman dagitoy kadagiti nairehistro a personal a sanikua a masapul a saggaysa nga ilista dagiti opisial ti gobierno.
Dagiti paltog a nakalista iti agan dagiti agasawa a Duterte-Carpio ket pakairamanan ti rifle, revolver, shotgun, ken pistol.
