BAGUIO CITY – Nakumpiskar ti agarup P12-M a gatad ti marijuana bricks ken ti napeggad nga hashish oil iti insayangkat dagiti otoridad nga interdiction operation iti Quarantine Checkpoint sadiay Kapayawan, Otucan Norte, Bauko, Mountain Province idi rabii.
Nagresulta metlaeng daytoy iti panakatiliw ni Rexton Magsino Bangang, 45-anyos, driver, residente ti San Juan, Taytay, Rizal ken agdama nga agnanaed sadiay Balaoa, Tadian, Mountain Province.
Maibasar iti report, pinara dagiti otoridad ti Tamaraw FX nga addaan plaka nga UAK 267 nga awanan ti OR/CR ken travel document.
Nakita met iti panaginspeksion dagiti otoridad iti uneg ti lugan ti sumagmamano a karton ken sako ken sadiay a naduktalan a naglaon dagitoy iti 99 a kilo ti marijuana bricks ken 60ml ti hashish oil.
Naamuan a ti nasao a lugan ket nabayag a maipaspasidong iti surveillance gaputa maatap a maar-aramat daytoy iti panakaibiahe dagiti marijuana.
Iti agdama, sumangsangon ni Bangang iti kaso a panaglabsing iti RA 9165 wenno ti Comprehensive Dangerous Drugs Act of 2002.
