BAGUIO CITY–Pinarut ken inuram dagiti otoridad ti agarup P20-M a gatad dagiti pinuon ti marijuana sadiay Tinglayan, Kalinga iti tallo nga aldaw a marijuana eradication operation dagitoy a nangrugi idi Huwebes, August 27 ken nagleppas ita nga aldaw ti Sabado, August 29.
Naisayangkat ti kaudian nga operasyon sadiay Loccong, Tinglayan, Kalinga, no sadino, implementasyon daytoy ti OPLAN 15 Oscar Ganja.
Nadiskobre dagiti otoridad ti agarup 100,000 a pidaso ti fully-grown marijuana plants iti pagmulaan nga addaan kalawa a 10,000 square meters.
Nupay kasta, awan ti nakemmeg a marijuana cultivator kabayatan ti operasyon.
Maipalagip nga idi napalabas a lawas ket nagsaruno a dinadael dagiti otoridad ti P84.1-M a gatad dagiti pinuon ti marijuana sadiay Kalinga.
