Nadiskobre ti agarup P30 milion a gatad ti marijuana iti dua a balikbayan boxes a naipatulod manipod Ontario, Canada.
Naamuan ti nasao nga iligal a droga babaen ti panagangot dagiti aso manipod iti Philippine National Police Drug Enforcement Group (PDEG) iti agarup 20,000 a gramo ti kush a nailemmeng iti uneg ti kahon.
Ti kargamento, a simmangpet idi Disiembre, ket in-flag ti forwarding company gapu iti napigsa nga angot a rumrummuar kadagiti pakete.
Suspetsa dagiti otoridad a ginundawayan dagiti nangipatulod iti Christmas rush tapno ipuslitda ti iligal a droga iti pagilian.
Naiturong dagiti kahon iti saan pay a nabigbig nga indibidual a nakaawat sadiay Bulacan.
Agtultuloy ti imbestigasyon ti Philippine National Police Drug Enforcement Group (PDEG) iti nasao nga insidente.
