Napukaw ken nasayang ti agarup P6.45 million a kuarta ti gobierno gapu iti agarup 700 nga infrastructure projects ti Department of Public Works and Highways (DPWH) a saan a maar-aramat wenno nabaybay-an.
Sigun iti Commission on Audit (COA), dumanon iti 747 a proyekto iti pagilian ti saan a maaramat gapu iti depekto.
Kasaruno daytoy iti saan pannakatumpal dagiti probision ti kontrata, kinakurang ti pangidaulo ken gapu iti kinakurang ti pannakabatay dagiti proyekto.
Naduktalan dagiti nasao a depekto ken kinakurang dagiti proyekto iti lima a District Engineering Offices iti Cordillera Administrative Region, maysa iti Ilocos Region, 11 iti Cagayan Valley, pito iti MIMAROPA, pito iti Bicol Region, siam iti Western Visayas, dua iti Eastern Visayas, dua iti Zamboanga Peninsula, lima iti Northern Mindanao ken dua iti Caraga.
Mainaig iti daytoy, kiniddaw ti COA iti DPWH nga imandatoda kadagiti kontraktor a dagus a tarimaanen ti depekto ken kompletuenda ti kurang kadagiti proyekto tapno malpasen.
Binalakadan pay ti nasao nga ahensia ti DPWH a mangisayangkatda iti regular inspections, bantayanda amin dagiti infrastructure projects ken tapno masigurado a makompleto amin dagiti proyekto kas panangtumpal iti naaprobaran a plano.
