BAGUIO CITY – Isingsingasing ti mayor ti La Trinidad, Benguet ti panakabukel ti agpapada a pagalagadan iti Benguet ken Baguio City mainaig iti manarimaan a community quarantine.
Kasaruno daytoy ti panakababalaw dagiti opisyal ken iti panakatikaw dagiti umili sadiay gapu iti agbaliw-baliw a quarantine classification ti Benguet.
Iti panakiuman ti Bombo Radyo Baguio, dinakamat ni Mayor Romeo Salda a daytoy ti pabpabasolen dagiti umili sadiay iti panakaipaulog ti quarantine classification ti La Trinidad.
Inyunay-unayna a ti panakabaliw ti klasipikasyon ti Benguet ket desisyon ti National Inter-Agency Task Force on Emerging Infectious Diseases.
Kinunana a kukuwestionaran dagiti umili apay a maiparit dagiti sumagmamano nga aktibidad iti masakupan ti La Trinidad ngem saan met a maiparit iti Baguio City.
Gapu iti daytoy, irekrekomendarna ti panagmaymaysa dagiti amin a municipal government iti Benguet ken ti siudad ti Baguio tapno maymaysa ti ipatungpal ken surotenda a pagadalan.
Innayonna pay nga uray maingetan dagiti pagalagadan iti Benguet ket adda latta dagiti saan a sumurot gaputa idildiligda iti sitwasyon ti Baguio.
