ATOK, BENGUET – Manarimaan ita ti panangduktal ti Atok Municipal Police Station iti agtagikua iti lugan a nakadiskobrean ti P3 million ti gatadna a marijuana idiay Tulodan, Cattubo, Atok, Benguet idi kalman.
Iti interview ti Bombo Radyo kenni PCapt. Arnel Abellera, dadaulo ti Atok Municipal Police Station, nakaawatda iti impormasyon manipud iti maseknan nga umili maipapan iti nakitana a lugan nga addaan kargana nga illegal a droga.
Agdagsen daytoy iti 25 kilograms.
Maibasar pay iti naawatda nga impormasyon, nagtaud ti nasao a lugan idiay Madaymen, Kibungan, Benguet ken paturong koma iti siudad ti Baguio.
Gapu iti impormasyon a naawat dagiti otoridad, kinuna ni PCapt. Abellera a dagusda a nangipatungpal iti checkpoint operation idiay Paoay, Atok, Benguet ngem nakadlaw ti driver ti nasao a lugan idi nakitana ti checkpoint.
Gapu iti daytoy, nag U-turn ken nagturong iti direksyon paapan idiay Buguias, Benguet.
Abandonado laengen ti nasao a lugan idi nasarakan daytoy dagiti otoridad.
Iti agdama ket manarimaan pailaeng ti kanayunan nga imbestigasyon para iti pannakabigbig ken pannakaarestar dagiti nanggandat a mangibiahe kadagiti nasao a droga.
Kinuna ni PCapt. Abellera a nakikoordinarda metten iti Land Transportation Office nu sinu ti indibidual a nakarehistro iti nasao a lugan.
