Impasigurado ni Malacañang nga agtultuloy ti panagbirok ti gobierno kenni sigud a Congressman Zaldy Co, iti laksid ti panangi-archive ti Sandiganbayan iti kaso a graft kontra kenkuana.
Sigun kenni Palace Press Officer Undersecretary Claire Castro, saan a baybay-an dagiti otoridad ti pagrebbenganda a mangbirok kenni Co a sumangsango iti kaso a graft ken malversation mainaig iti maipagarup nga anomalous road dike project idiay Naujan, Oriental Mindoro.
Impaganetget ni Atty. Castro a ti panang-archive iti kaso ket maysa laeng a procedural nga addang ken saanna a kayat a sawen a naibasura dagiti kaso a naipila kontra kenni Co.
Inlawlawag ti opisial a temporario laeng a naikkat ti kaso iti listaan dagiti aktibo a kaso iti korte ken dagus a maisubli iti regular a proseso apaman a maaresto ti sigud a mammanday-linteg.
