BAGUIO CITY – Mamati ti Commission on Elections (COMELEC) – Baguio nga ado pay ti agparehistro a botante ditoy siudad para iti masungad a 2022 National and Local Elections (NLEs).
Iti panakiuman ti Bombo Radyo Baguio, kinuna ni City Election Officer Atty. John Paul Martin a positibo ti turnout ti voter’s registration ti siudad gaputa maragragpat ti average a 50 nga aplikante iti innaldaw kas maitunos iti probisyon ti COMELEC.
Inlawlawagna a nupay bassit daytoy a bilang no idilig iti normal a sitwasyon, nasayaat latta ti nasao a datus ita a panawen ti pandemya.
Kabayatana, inaklon ni Atty. Martin nga awan pay ti inlatang ti nasyonal a pondo para iti kadagiti kagawaan a maaramat iti sumaruno nga eleksion gaputa nakatutok ita ti COMELEC iti voter’s registration.
Nupay kasta, impanamnamana a nakasagana latta ti COMELEC-Baguio iti kanito nga adda ti pagbaliwan ti panakaipatungpal ti eleksion a naituding inton 2022.
