Naibinsa-binsa dagiti nagduduma nga aktibidad ti Cordillera Pride Community Leaders para ita a maramrambakan ti pride month para kadagiti LGBTQ+ community.
Iti pannakiuman ti Bombo Radyo kenni Van C. Sanchez, Founder ti Cordillera Pride Community Leaders, kinunana a naiyuswat dagiti aktibidad dagitoy idi Hunyo a dos, iti agdama a tawen no sadino daytoy ti panawen tapno iselebrar dagitoy ti karbenganda iti komunidad.
Sigun kenkuana, adda ti maangay a partnership discussion iti City Planning and Development Office iti siudad ti Baguio tapno isingasing ti ordinansa para iti pagsayaatan dagitoy inton June 27, 2025.
Maangay metlaeng ti maysa nga aldaw a discussion ken aktibidad para kadagiti LGBTQ+ community bayat a maangay metlaeng ti grand parade a pakipasetan dagiti LGBTQ+ allies, supporters, advocates ken dadduma pay.
Kabayatanna, maangay ti awarding ken recognition kas panangbigbigda kadagiti miembro dagitoy inton June 28,2025.
Malaksid iti dayta, kinuna pay ni Sanchez nga adda ti ipatungpalda nga outreach program para dagiti LGBTQ+ senior citizens, displaced workers ken persons with disability.
Kagiddan dayta, impetteng ni Sanchez a marikriknada ti panagayat ken proteksyon ti tumunggal maysa nangruna kadakuada a karaman iti nasao a community.
Innayonna a mabalin laeng a contact-en dagitoy iti social media page-da no adda may dagiti damagen kadakuada wenno mabalin a bisitaen ti opisina-da sadiay Legarda Road, Baguio City.
