Nainget a pinaglibakan ni Department of Health (DOH) Secretary Jose “Brix” Pujalte Jr. dagiti akusasyon a masansan daytoy nga agturturong iti casino tapno agsugal.
Sigun iti statement ti nasao nga opisina, ti dakdakamatenda a panagbisita ni Pujalte,Jr. iti maysa a hotel ket para iti maysa pay nga opisyal para iti maysa a meeting ken saan a para iti personal daytoy a pakalinglingayan.
Inlawlawag metlaeng ni Pujalte nga idi Hulyo 20 , nagturong daytoy iti maysa a hotel idiay Sorsogon para iti maysa a meeting kadua dagiti lokal nga opisyales ti Masbate ken Sorsogon.
Inawagan met ni Pujalte a maysa a bidut ti agwarwaras a surat ken impettengna a daytoy ket tapno mangdadael iti kredibilidad na kas baro a dadaulo ti DOH.
Amin daytoy ket kasaruno iti panangisumite ti maysa a grupo a nagpaam-ammo kas “Concerned Citizen” iti maysa complaint letter iti Presidential Complaint Center (PCC) idiay Malacañang idi kalman.
Nilaon ti nasao a surat ti akusasyon a masansan a makisugsugal idiay Okada Manila ken Solaire Resort and Casino ni Pujalte ken panangaramatna iti nagan a “Louis Santos” tapno saan daytoy a mabigbig ti publiko.
Iti baet dayta, impanamnama ti DOH iti publiko nga agtaltalinaed a nakatutok ni Pujalte ken ahensya iti panangipaay iti dekalidad a serbisyo iti pagilian. //bombokaren.c.sapirao
