Dinutukan ni President Ferdinand “Bongbong” Marcos Jr. ni Assistant Director Angelito Magno kas baro a Director ti National Bureau of Investigation (NBI), kasaruno ti panaglusulos ni sigud a Direktor Jaime Santiago.
Ti baro a hepe ti NBI ket sigud a dadaulo ti Information and Communications Technology Service (ICTS) ti NBI, nu sadinno responsable isuna kadagiti technological aspect ti operasyon ti ahensia.
Nangrugi ni Magno kas maysa a line agent iti NBI, isut gapuna nga ammona ti field operations.
Nagserbi metlaeng daytoy kas Deputy Director for Investigative Services idi Agosto 2024, karaman iti panagsapul kenni Bamban Mayor Alice Guo ken dadduma pay a high-profile investigations.
Kinumpirmar ni Santiago ita a Lunes nga inawat ni President Marcos ti irrevocable resignation daytoy. Sigun kenkuana, manamnama a mairuar ti opisial a pammilin kadagiti sumaruno nga aldaw, ken impaganetgetna a maaddaan ti baro a dadaulo ti ahensia.
Nagyaman met ni Santiago kadagiti kameng ti NBI iti suportana ken dedikasion iti panawen ti panangidaulona. Namnamaenna nga ituloyda ti panagserbi iti publiko.
Maipalagip a ni Santiago, a maysa a retirado a judge, ket nadutukan kas NBI Director idi Hunyo 2024. Ngem kalpasan laeng ti dua a bulan, impilana ti panaglusulosna.
