Inlawlawag ni Norman Marquez, maysa nga Animal Advocate ti maipapan iti Animal Welfare Act.
Kasaruno daytoy ti panagpositibo iti dog DNA iti karne nga idiaydiaya ti maysa a restaurant idiay La Trinidad, Benguet.
Iti pannakiuman ti Bombo Radyo Baguio kennni Marquez, inlawlawagna dagiti mabalin a proseso apaman a matiliwan ti maysa nga indibidual a mang-ababuso kadagiti anyaman a klase ti ayop.
Innayona a dagiti restaurant a mangidiaydiaya iti karne ti aso ket mabalin a sumango iti pananglabsing iti RA10611 wenno ti Food Safety Act. Sigun kenkuana, saan daytoy nga agtennag iti pananglabsing iti Animal Welfare Act wenno Republic Act No. 10631 gapu ta ti limitasyon laeng daytoy ket ti panagpapatay ti aso.
Kabayatanna, imbinglayna nga agtaltalianed a karit kadakuada ti panangtiliw kadagiti restaurant nga agidiaydiaya iti karne ti aso.
Sigun kenkuana, saan gamin a dagos a maduktalan nu karne ti aso ti idiaydiayada iti publiko. Kasapulan pay a dumalan daytoy iti proseso no sadino mabalin nga agpaot daytoy iti dua a lawas. //bombokaren.c.sapirao
