BAGUIO CITY – Land dispute wenno apa iti daga ti makitkita a motibo iti panakapapatay ti maysa a maestro sadiay Brgy. Lipcan, Bangued, Abra idi Setyembre 28.
Ti biktima ket ni Rudy Steward Dugmam Sayen, 38-anyos, mannursuro, miyembro ti LGBTQ+ ken residente ti Bangued, Abra.
Immunan a nakemmeg ken napilaan ti kaso dagiti uppat a suspek a da Romel Paa alyas “Ambong”, ti gunman; Sonny Boy Tullas, driver ti gunman; Aldrin Alagao, lookout ken Abelardo “Abe” Talape, middle man.
Sigun kenni Abra PPO Acting Provincial Director PCol. Many Castillo Cula, inaklon dagiti suspek a nabilin laeng dagitoy a mangpaltug iti biktima kasukat ti P100-K.
Sigun pay kenni PCol. Cula, maysa a barangay official ti maitudtudo a mastermind iti nasao a krimen ken kabagyan a mismo daytoy ti biktima.
Maipalagip a napaltugan ti biktima kabayatan ti panagturongna iti pagadalan tapno agisuro.
Babaen met iti tulong dagiti CCTV footages ken maseknan nga umili ket nabigbig ken natunton dagiti suspek.
