Inlawlawag iti National Bureau of Investigation(NBI) nga awan iti problemada iti kidkiddawen ni Vice President Sara Duterte a panakaitantan iti imbestigasyon seknan iti pangtana kenni President Ferdinand Marcos Jr., First Lady Liza Araneta Marcos, ken ni House Speaker Martin Romualdez.
Sigun kenni National Bureau of Investigation Director Jaime Santiago, saan mabalin a palampasinda wenno agulimekda laeng iti panagpangta ti bise presidente iti presidente ken kadagiti daduma pay nga opisyales iti pagilian gaputa mandato iti nasao nga opisina nga imbestigaran daytoy.
Impettengna a ti imbestigasyon ket agbalin nga “impartial.”
Maipalagip nga impaayanen iti NBI iti subpoena ni Vice Presidnet Duterte idi laeng Biernes tapno mailawlawagna dagiti insawangna a panagpangta.
Nupay kasta, nagkiddaw daytoy iti panakaitantan iti schedule tapno maatendaranna ti manarimaan metlaeng a panagdengngeg iti House of Representatives seknan met iti saan a nalawag a panakaaramat iti confidential fund iti opisina daytoy.
Immuna metten a nagballaag iti Department of Justice(DOJ) a mabalin a sumango ti bise presidente iti kaso a libel, defamation, ken grave threat iti inaramidna a panagpangta kenni President Ferdinand Marcos Jr.
