BAGUIO CITY – Aw-awisen ti Department of Labor and Employment (DOLE) – Cordillera dagiti displaced workers iti rehion, partikular dagiti trabahador iti sektor ti turismo ken edukasyon a naawanan ti panggedan gapu iti pandemya tapnu agaplikarda iti COVID-19 Adjustment Measures Program (CAMP) 2.
Sigun kenni DOLE-Cordillera Assistant Regional Director Jesus Elpidio Atal Jr., daytoy ket gaputa inton December 10 ti deadline iti panagaplikar iti nasao a tulong pinansial.
Dinakamatna a kangrunaan a puntiryada a tulongan iti CAMP 2 ket dagiti 17, 415 a displaced workers iti sektor ti edukasyon ken dagiti 9,664 iti sektor ti turismo.
Inlawlawag met ni DOLE-Cordillera Regional Director Ezequiel Ronie Guzman nga iti sektor ti edukasyon ket kwalipikado dagiti teaching ken non-teaching personnel dagiti pribado a pagadalan ti elementarya ken sekondarya.
Kinunana nga iti sektor ti turismo ket kwalipikado met dagiti tourism-related workers a napukawan ti panggedan kas kadagiti grupo dagiti tour guides nga awanan ti akreditasyon manipud iti Department of Tourism ngem addaan met ti akreditasyon manipud iti lokal a gobyerno a kas sadiay Bokod ken Kabayan iti Benguet.
