BAGUIO CITY – Naituding a maipaay kenni Maria “Whang-od” Oggay wenno Apo Whang-od ti pammigbig a Dangal ng Haraya Award for Intangible Cultural Heritage.
Mabigbigbig ni Apo Whang-od a kataengan a mambabatok wenno tattoo artists nga agar-aramat iti tradisyonal a wagas ti panagtattoo iti pagtaenganna sadiay Buscalan, Tinglayan, Kalinga.
Idauluan ni National Commission for Culture and the Arts (NCCA) chairman Virgilio Almario ti panakaipaay ti nasao a pammigbig kenni Apo Whang–Od iti seremonya a maangay iti Kalinga Capitol Plaza inton June 25.
Nabigbig met ni Apo Whang-od kas maysa kadagiti ‘oldest living traditional tattoo practitioners’ ti Kalinga babaen iti maysa nga espesyal a resolusyon.
Nailanad met iti waragawag ti NCCA a ti agtultuloy a trabaho ni Apo Whang-od kas mambabatok ken ti impluwensiana iti traditional arts scene ti Pilipinas ti nangitunda iti nangato a panaka-ammo seknan iti kultura dagiti taga-Kalinga.
Naamuan a karaman kadagiti naipaayan iti nasao a pammigbig ket da Senator Edgardo Angara, Architect Augusto Villalon, Susan Calo Medina, Senator Loren Legarda ken Dr. Jesus Peralta.
