Kidkiddawen ni Kingdom of Jesus Christ (KOJC) leader Pastor Apollo Quiboloy iti korte ti Pasig City nga agpa-“hospital arrest” daytoy idiay Davao City, sigun iti Philippine National Police (PNP).
Bayat ti press briefing ita nga aldaw, kinuna ni Police Colonel Jean Fajardo, pannakangiwat ti PNP, nangipila ti mosion ti kampo ni Quiboloy iti Pasig City Regional Trial Court (RTC) Branch 159 para iti hospital arrest ni Quiboloy ken ti maysa pay nga akusado a ni Ingrid Canada.
Gapu iti dayta, dagos nga imbilin ti hues iti PNP a maipasidong iti medical checkup ni Quiboloy ken Canada kadagiti doktor ti gobierno.
Bayat a maur-uray ti resulta ti medical checkup ni Quiboloy, agtalinaed latta daytoy iti detention facility ti PNP.
Dagiti uppat a kaduana nga akusado ket imbilin ti korte a maiturong dagitoy idiay Pasig City Jail.
Ni Quiboloy ken dagiti kakaduana nga akusado sumangsango iti panaglasbing iti Special Protection of Children Against Abuse, Exploitation, and Discrimination Act kasta metten iti qualified human trafficking.
Nangipila metten da Quiboloy ti “not guilty” plea idi naibasa ti ti indictment iti korte ita nga aldaw.
Malaksid iti sangsanguen ni Quiboloy iti Pilipinas, sumangsango metlaeng daytoy ti kaso idiay Amerika seknan iti mapapati a “conspiracy to engage in sex trafficking by force,” “fraud and coercion and sex trafficking of children;” “sex trafficking by force, fraud and coercion;” “conspiracy;” ken bulk cash smuggling.
Ngem amin nga alegasion ket pinaglibakan ti kampo ni Quiboloy.
