Makaung-unget ita dagiti residente idiay Estados Unidos kasaruno ti assassination attempt kenni sigud a US President Donald Trump nu sadino, natamaan ti kannawan a lapayag daytoy iti maatap nga sniper shot kabayatan iti rally nga impatungpalna idiay Butler,Pennsylvania, alas sais ti sardam kadaytoy laeng a Sabado.
Iti panakiuman ti Bombo Rado kenni Rufino Pinoy Gonzales,Bombo International News Correspondent idiay Estados Unidos, ti ulo ni Trump ti puntirya ti shooter ngem saan a nagballigi daytoy nu sadino, ti kannawan laeng a lapayag ni Trump ti natamaan a nangitunda ti panakadangranna.
Sigun kenni Gonzales, saan a kritikal ti kasasaad ni Trump ken kinumpirmar metten ni United States Secret Service spokesperson Anthony Guglielmi a nasayaaten ti kasasaad ti sigud a presidente.
Nupay kasta, adda ti pimmusay kadagiti audience a timmabuno a nakapwesto iti likudan ni Trump idi napasamak ti insidente,kasta met a napapatay a dagus ti maatap a gunman wenno shooter.
Gapu iti dayta, posible a makanselar dagiti sumarsaruno pay a rally a naikeddeng nga ipatungpal ni Trump para iti panagtarayna kas presidente manen ti Estados Unidos.
Iti agdama, manarimaan paylaeng ti panag-imbestigar dagiti otoridad iti rason wenno motibo iti nasao nga assassination attempt ken nu asino ti adda iti likudan daytoy.
Kabayatanna, impeksa met ti agdama a US President a ni Joe Biden a maragsakan daytoy a natalged ti kasasaad ni Trump ken kinondenarna ti nasao a krimen.
Kagiddan dayta, pinagyamananna met ti napartak a panagresponde dagiti kameng ti United States Secret Service.//Bombo Rob Domiguez
