TAYUM, ABRA – Nasarakanen ti bagi ti 2-anyos nga ubing a lalaki a mapukpukaw idiay Tayum, Abra itay laeng agsapa.
Iti exclusive interview ti Bombo Radyo kenni Police Executive Master Sergeant (PEMS) Rholen Emherson S. Bigornia iti Tayum MPS, impadamag ti kapamilya-na a mapukpukaw ti 2-anyos nga ubing iti alas siete ti agsapa, idi laeng kalman, Marso 17.
Dagus met a nagresponde dagiti kameng ti pulisya maipapan iti panakapukaw ti ubing.
Maibasar iti imbestigasyon, inayaban ti lola ti 2-anyos nga ubing tapno buguwan ti saka daytoy gapu ta narugit.
Kalpasan dayta, saanen a nakita ti ubing rason nga immasidegda iti kustodiya ti pulisya para iti panakabirok daytoy.
Kalpasan ti sumagmamano nga oras, nagdesisyon dagiti otoridad ken Barangay officials ti Gaddani, Tayum a paabbatan wenno i-drain ti danum iti irigasyon tapno biruken ken kumpirmaren nu natnag daytoy.
Kalpasan a naidrain ti danum, nasarakan ti bagi ti ubing nga awanan ti biag.
Posible met a naikadlis ti ubing a rason ti panakatnagna iti nasao nga irigasyon.
Nabigbig daytoy a ni Prince Wayne German a residente ti Brgy. Gaddani Tayum, Abra.//Bombo Jez Lapizar/Bombo Marinel Rodrigo
