Inlawlawag ti maysa a konsehal iti Baguio City a saan a ti siudad ti nangpili kadagiti senior citizen a maipapaayan iti sangaribo a piso a social pension nu di ket ti Department of Social Welfare and Development (DSWD).
Iti panakiuman iti Bombo Radyo kenni Councilor Elmer Datuin, chairperson iti Committee on Social Services, Women, and Urban Poor, imbinglayna nga iti agdama ket agarop innem a ribo laeng a senior citizen iti Baguio ti makaaw-awat iti social pension nga inlatang iti nasao nga ahensya para iti siudad.
Sigun kenni Datuin, limitado laeng iti innem a ribo a senior citizen iti siudad ti maipapaayan iti nasao a pension rason nga adda iti waiting list.
Innayonna a dagiti senior citizen a makapagnumnumar ita iti nasao a programa ket dagiti approved social pensioner iti Department of Social Welfare and Development (DSWD).
Mainaig iti dayta,inlawlawag ti konsehal a saan pay naiyimplimintar ti universal social pension gapu ta saan a naaprubaran daytoy iti Senado.
Babaen iti masaksakad a universal social pension, sapasap a maipaayan dagiti senior citizen iti pension.
Gapu iti dayta, mangnamnama dagiti daduma a maipila manen daytoy iti kongreso para iti panakaadal ken posible a panakaaprubarna.
Kabayatanna, inaklon ti opisyal nga adu dagiti rumrumwar nga isyu seknan iti panakaipaay iti pension kadagiti napili a senior citizen rason nga insingasingna ti panagaplikar kadagiti daduma pay a programa iti DSWD a mabalin a pakaalaan iti pagnumaran kas iti AICS.//Bombo Rob Dominguez
