BAGUIO CITY – Nabigbig ti City of Pines kas kabaknangan a siyudad iti ruar ti Metro Manila idi tawen 2022 kas maibasar iti datus nga inruar ti Philippine Statistics Authority (PSA).
Maibasar iti Provincial Product Accounts ti Philippine Statistics Authority, nairekord ti Baguio City ti kangatoan a per capita gross domestic product manipud kadagiti probinsiya ken highly urbanized cities iti pagilian idi 2022.
Dumanon iti P420,016 ti per capita gross domestic product ti Summer Capital of the Philippines.
Nangatngato daytoy nu idilig iti national average a P178,751.
Simmaruno iti Baguio City ti Cagayan de Oro City nga addaan ti P343,936 a per capita GDP, Lapu-Lapu City nga addaan ti P313,039, Iloilo City nga P306,444, probinsiya ti Bataan a P297,930, Cebu City a P293,426, Laguna a P287,280, Mandaue City a P274,376, Davao City a P258,811 ken Batanes a P251,955.
Ti per capita GDP ket basaran nu kasano kapartak ti panagdur-as ti ekonomiya ti maysa a lugar ken nu kasano a kabaknang wenno kapobre daytoy.
Ti naipatungpal a Provincial Product Accounts ket saklawenna laeng ti 82 a probinsiya ken 17 a highly urbanized cities iti 16 pilot regions iti pagilian.
Maipalagip nga idi Oktobre 2022, nabigbig ti Quezon City kas kabaknangan iti pagilian nu maipapan iti assets kas maibasar iti report ti Commission on Audit (COA).
