BAGUIO CITY – Maisingsingasing kadagiti parentes nga ikonsiderada nga i-enroll dagiti annakda kadagiti daduma pay a para-publiko a pagadalan iti siudad a mangidiaya ti Senior High School program.
Iti panakiuman ti Bombo Radyo kenni Whitney Dawayen, principal ti Baguio City National High School, walo gasut laeng nga estudyante ti kabaelan nga iyakomodar ti nasao a pagadalan para iti Grade 11.
Sigun kenni Dawayen, dimmanon iti dua a ribo a paryentes ken estudyante ti nagpila para iti nasao nga enrollment idi kalman nu sadino nasurok a doble iti bilang ti kabaelan nga iyakomodar ti pagadalan.
Inladawan ti principal nga arigna a kas iti Panagbenga ti kinasapa dagiti nagpila nu sadino nagpwesto dagiti daduma iti ruar ti pagadalan alas singko ti malem idi Hulyo 10, rason a pinaayanda ti numero dagitoy tapno makaawidda ken saanda a maturog iti nasao a pagadalan wenno kadagiti sidewalks.
Daytoy ket maitunos iti “First Come, First Serve” a sursurotenda.
nu koma dakami ti matungpal ket isu koma ti aramiden mi, ipriority mi koma dagiti completers ti baguio city high school ngem anya ngay ngarod, ket public school tayo met isunga open ladta jay enrollment iti amin a naggraduar o nagcomplete iti public school man o private school iti intero a pilipinas.
Mr. Whitney Dawayen- Principal- Baguio City National High School
Inlawlawag ni Dawayen a nupay kayatda nga ipangruna dagiti completers ti Baguio City National High School para iti Grade 11 enrollment, awan ti maaramidanda gapu ta maysa daytoy a para-publiko a pagadalan rason nga awatenda dagiti enrollees aniaman a pagadalan ti nagtaudanda.
Kabayatanna, inyunay-unay ni Dawayen a saanen a mabalin a manayonan dagiti enrollees para iti nasao a grade level gapu ta saan a mabalin ti over population iti regular sized classroom.
Gapu iti dayta, opisyalen a naisara ti enrollment iti Grade 11 idi metlaneg kalman bayat a manarimaan metten ti enrollment para kadagiti Grade 12.//Bombo Rob Dominguez
