Nalaos ti ragsak ti Baguio City Solo Parents Federation kalpasan a naipaayan dagitoy ti P1 million a livelihood program manipud iti lokal a gobyerno kagiddan ti panakarambak ti Solo Parents Week a nangrugi idi Abril a kinse iti agdama a tawen no sadino addaan daytoy ti tema a “Solo Parent na Rehistrado, sa Gobyerno Tiyak na Protektado!”
Iti panakiuman ti Bombo Radyo ken da secretary Joy Malhabour ken auditor Alma Inong ti nasao a federation, kinunuda a dakkel a tulong daytoy nangruna ket adda ti agad-adal ken supsuportaranda nga annak.
Sigun kenni Alma, dumanon iti agarup 1, 700 ti miyembro ti Baguio City Solo Parents Federation ngem namnamaenda a manayunan pay daytoy agsipud ta agtultuloy ladta ti panagparehistro dagiti daduma pay a saan a nakarehistro a solo parent.
Maibasar iti Republic Act 11861 wenno ti Expanded Solo Parents Welfare Act, dagiti solo parents ket saan laeng a maipapan kadagiti asawa a saan a tinakderan wenno inbati ti asawada no di ket pakairamanan dagiti biktima ti panagrames, dagiti asawada nga adda iti pagbaludan ken daduma pay.
Iti panagbalin a solo parent da Alma ken Joy, kinunuda a rumbeng ti panagbalin a madiskarte iti biyag, ti panagserrek kadagiti anyaman a racket tapno adda ti panggedan ken ti panangitugot kadagiti annakda bayat ti panagtrabahoda.
Impeksa ni Alma nga iti panagbalin dagitoy kas solo parent ket isu met ti nagbalin a karit tapno mas agbalin dagitoy a natibker para kadagiti anakda tapno adda a maipaayda ti mayat a panagbiyag kadagitoy.
Kabayatanna, impeksa da Alma ken Joy a todo ti suporta ti lokal a gobyerno, ti Department of Social Welfare and Development (DSWD) kadagitoy a solo parents no sadino ado dagiti benepisyo a maipapaay kadagitoy a pakairaman ti medical assistance, education assistance, panakaipaay ti diskuento kadagitoy ken daduma pay.//M
