BAGUIO CITY – Manamnama a maipatungpal sadiay probinsia ti Apayao ti Balik Probinsya Bagong Pagasa (BP2) Program iti rehion Cordillera.
Sigun kenni National Economic and Development Authority (NEDA) – Cordillera Senior Economic Development Specialist Freda Toyoken, 11 nga indibidual a sangkapamilya ti naituding nga agawid sadiay Apayao.
Kinunana a ti National Housing Authority ti nangited iti nasao a listaan iti opisinada nga agserserbi a secretariat ti BP2 Program ditoy Cordillera.
Dinakamatna a naipasidong dagiti benipisaryo iti nainget nga assessment ken validation babaen iti Department of Social Welfare and Development ken iti lokal a gobyerno ti Apayao.
Maipalagip a nabukel ti BP2 Program tapnu maksayan dagiti agnanaed sadiay Metro Manila ken maallukoy dagiti karaman iti low income, dagiti naawanan ti panggedan gapu iti agdama a pandemya ken dagiti agnanaed kadagiti naririsgo a lugar iti panagsubli dagitoy iti nagtaudanda a probinsia.
Inkari met dagiti nagduduma nga ahensia ti gobyerno iti rehion ti kinasaganada a mangipaay ti tulong kadagiti nasao nga indibidual, pakairamanan ti panagsanay para iti panagnegosyo, scholarship programs ken dadduma pay kas maibasar iti pagkasapulan dagiti benipisaryo.
