PHILIPPINES – Sititibker ni Bamban Mayor Alice Guo nga inosente ken nagkari nga ituloyna ti panagdepensarna iti integridad ken personalidad daytoy kalpasan a nasuspendir ken ti dua pay a kadwa-na iti dua a bulan.
Daytoy ket gapu ta napigsa ti ebidensiya a makitkita dagiti maseknan a guilty dagitoy.
Iti maysa nga statement, kinuna ni Guo a resrespetoenna ti legal a proseso ken aw-awatenna ti desisyon ti Ombudsman.
Impaganetget pay ti Mayor a nagserbi iti pagilian ken kadagiti umili daytoy nga addaan ti integridad.
Kinunana pay a lawlawaganna dagiti akusasyon kontra kenkuana ken nakasagana a makitinnulong kadagiti otoridad tapano maipasigurado ti kinapudno ken hustisya.
Impetteng ti Mayor a daytoy ket panaglabsing iti karbenganna kas indibidual ken kas lider a pinatugaw dagiti botante ti Bamban.
Kabaytaanna, kinuna met ni Atty. Nicole Jamilla, abogado ni Guo a biktima daytoy ket saan a nainkalintegan a nairaman kadagiti isyu manipud iti regulatory responsibilities ti Philippine Amusement and Gaming Corporation (PAGCOR).
Inlawlawgna pay a ti panangipaay ti business permit iti POGO firm a Zun Yuan ket dimmalan iti proseso ken protocol pakairamanan iti PAGCOR ken ti saan a dagus a panagikkat ni Guo iti business permit ket maitunos iti umno a proseso a masapul a masurot.
