BAGUIO CITY – Agtultuloy ti imbestigasion ti Baguio City Police Office (BCPO) tapno maduktalan ti napasamak iti maysa a lalaki a nasarakan a maysan a bangkay sadiay Balacbac Road, Baguio City itay agsapa.
Sigun Police Staff Sergeant Nestimar Taasin, imbestigador ti BCPO Station 10, saan pay na nabigbig ti kinasiasino ti biktima.
Kinunana a nakasuot ti bangkay iti blue a maong pants ken green nga underwear bayat nga awan ti suot daytoy a T-shirt.
Maibasar iti report, adda ti rosary tattoo iti barukong ti bangkay ken star tattoo iti kannigid ken kannawan nga abaga daytoy ken adda ti fresh a dara iti agongna.
Sigun ken ni Taasin, nasarakan ti bangkay iti asideg ti igid ti kalsada iti asideg ti turning point.
Sigun iti maysa a residente ti Balacbac a ni Apolonio Dimot, nakitana ti biktima idi adda daytoy iti deppaar ti Magsaysay Avenue, Baguio City idi rabii.
Inlawlawagna a nakitana ti biktima a makikinkinnamat iti uppat a lalaki ken idi nakitana daytoy ket awan met laeng ti suotna a T-shirt.
Sigun iti BCPO, awan ti aniaman a dunor a sinagrap ti biktima isut gapuna a maipasidong daytoy iti otopsia.
