BAGUIO CITY – Nasarakan dagiti otoridad ti bangkay ti maysa a babai iti baba ti rangtay iti nagbeddengan ti Camp 2 ken Camp 3 sadiay Tuba, Benguet idi malem kalman.
Iti interview ti Bombo Radyo kenni PMaj. Dominador De Guzman Jr., hepe ti Tuba Municipal Police Station, kinunana a posible nga idi agsapa kalman a pimmusay ti nasao a babai.
Nupay kasta, awan paylaeng ti pakabigbigan ti bangkay gaputa awan ti narekober dagiti otoridad a mabalin a pakaalaan ti impormasyon seknan iti daytoy.
Nakasuot ti babai iti navy blue sweatshirt, gray leggings ken mapapati nga agtawen iti 45 agingga 50, napudaw, brown ken atiddog ti buokna, 5’4 ti katayagna..
Kinuna metlaeng ni De Guzman nga awan ti aniaman a dunor wenno sugat iti bangkay.
Iti agdama, naiturong ti bangkay iti maysa a punerarya sadiay Marcos Highway para iti otopsiya.
Kabayatanna, agpanpanawagan met ti Tuba Police kadagiti mapukpukawan iti kapamilya wenno kabagyan nga agturong laeng iti istasyonda para iti pakabigbigan ti bangkay.
