Nasarakan ti bangkay ti maysa a senior citizen idiay Sitio Lower Lasilas, Nangalisan, Tuba, Benguet idi April 27, 2025.
Nabigbig daytoy a ni Ricardo Perez Calica, agtawen iti 70, naasawaan ken residente iti nasao a lugar.
Ti bagi ti nasao a lalaki ket nasarakan dagiti tallo nga indibidwal a residente met kadagiti munsipyo iti Tuba ken Itogon.
Kasaruno dayta, nagturong dagiti kameng iti pulisya ken opisyales iti Barangay Nangalisan iti ayan ti bangkay nu sadino, sigun iti panangiladawan dagiti otoridad iti daytoy ket nakasikig ken nakakukot bassit a nadanunanda iti derra-as nga addaan iti kauneg a tallo a metro.
Rimwar met iti eksaminasyon nga impatungpal dagiti kameng iti SOCO Benguet Provincial Forensic Unit-CAR nga awan iti visible external injuries ti biktima malaksid kadagiti gasgas wenno sugat iti ulo daytoy.
Nupay kasta, nagkedked met ti maseknan a pamilya nga ipaisidong iti otopsiya ti nasao a bangkay gapu ta patienda nga accidental ti ipupusay daytoy. //Bombo Genzel Depayso
