Manamnama a mairuar iti publiko ti Baraki wenno ti Smart garbage bin a maysa nga inobasyon dagiti kameng ti General Services Office.
Sigun kenni Kyle Russel Lucero, maysa kadagiti nakapanunot iti Baraki, daytoy ket maysa a produkto ti panagadalda idi kolehiyoda paylaeng.
Kinunana a nakitada ti parikut maipapan iti waste overflow tunggal peak season, rason nu apay a napanunotda nga idevelop ti maysa a basuraan a makatulong iti waste management iti siudad.
Ti Baraki ket addaan iti detector a makadetect nu napunno ti basuraanen, nu napunno daytoyen ket automatic nga agrekep ti basuraan tapno saanen a pagbasuraan pay ti tattao a makaitunda iti panaglepyas daytoy.
Mabalin laeng a maaramat manen ti basuraan nu naalan dagiti garbage collectors a karga daytoy.
Malaksid iti dayta, adda ti software a pangmonitoranda kadagiti Baraki.
Ditoyda a makita nu napunno ti basuraan tapno maipakaammu kadagiti agkolekta ti basura.
Maaramat metlaeng daytoy kas panangkolekta iti datos maipapan nu anya nga oras ti kaaduan ti bilang ti maibasbasura, anya a lugar ken dadduma pay tapno makita nu ayanna dagiti hotspot ti kaaduan a maur-urnungan ti basura ken tapno makaaramid ti solusyon iti waste management iti siudad.
Mainaig iti daytoy, kabaelan ti Baraki nga aglaon ti 435 liters a basura sakbay nga agrekep daytoy nu sadino manamnama a malaonna ti basura a maibelleng iti agmalmalem kadagiti parke.
Mabalin pay met a maidevelop ti features daytoy depende iti kasapulan dagiti agaramat iti daytoy.
Posible a maikkan daytoy ti weight sensor ken dadduma pay a makatulong iti panagkolektada kadagiti kasapulan a datos.
Maideploy dagiti uppat a Baraki iti paset ti City Hall, dua idiay Botanical garden ken maysa idiay Wright park.
Nupay kasta, kasapulan ti Baraki ti internet connection rason nu apay mapagad-adalan pay nu kasanu a maikabil ti Baraki dagiti dadduma pay a parke iti siudad agsipud a Solar powered met daytoy.
Nakasagana a maideploy ti Baraki kadagiti nagduduma a parke iti siudad, ken maiyur-uray laengen ti internet connection kadagitoy sakbay a marugyan ti panag-operate dagitoy.
